147

Liburu hau

Lankideek igarri al dute nire falta?

(Ez du inporta).

Erretiroa aurreratzeko asmoa daukat

idazten jarraitzeko.

Probatu. Aldatu.

      Birsortu.

Horretan ekiten dit amorante frantsesak

:

Victor, hezur-mamizko pertsonaia bakarra,

nire happy end erreala, nire happy end erreala.

Oso berandu azaltzen da nobelan,

aktore sekundario samarra da.

Baina halako ustekabea bat-batean, halako zirrara

non uztartu?

Hor geratu da bion partea, zabal-zabal.

Amodioarekiko boikota amaitzear nengoela

agertu zen nire bizitzan… Eta hara,

benetako bizitza sartu zen nobelara.

Eten-puntu koloretsuz dator geroa.

Inoiz ez da berandu ametsak landatzeko.

Lore piloa landatu dugu etxe bueltan

:

Bai, egun distiratsu bat

egun loredun bat da

halabeharrez.

Hala idatzi zuen gure Diane Wakoskik.

Bordelen erosi nuen ale maiztu bat,

bigarren eskuko denda batean,

eta argiz goxatu zizkidan egunak,

eta bioletaz.

Nire etxeari izena eman diogu

:

Solitude, horixe baitu esentzia.

Eta tratuan gara udal hirigintza sailarekin

pistaren trazatua aldatzeko.

Bere lurretik maite du zuhaitzak basoa.

Ez dut liburu hau

amorante frantsesari esker idatzi,

inola ere,

baina hauxe idaztea izan da, niretzat,

maitasuna.