Poesia kaiera
Poesia kaiera
June Jordan
itzulpena: Ane Garcia Lopez
2020, poesia
64 orrialde
978-84-17051-43-3
June Jordan
1936-2002
 
 

 

Metaerretorika

 

Homofobia

arrazakeria

autodefinizioa

borroka iraultzailea

 

Gaur gauean

eztabaidagai dugu

gure maitasuna

 

bereiz eseri gara

lerro beraren bi muturretan, itxuraz,

eta distantzia sentitzen dut

nire begien artean

nire hanken artean:

gure bereizketaren hauts-topografia

lehor bat

 

Bitartean jendea liskarrean dabil

gu batzeko

probabilitatearen inguruan eztabaidan

 

Gogora dakarte inolako ideologia

gainditzera ausartzen ez den historia abisala

 

Ez nator bat zurekin

ez zatoz bat nirekin

eskala kontua dirudi arazoak

 

Emango dizkidazu neurri estatistikoak,

zure ahoarenak nire ahoan

zure bularrenak nireen gainean pausatuta daudenean?

 

Sinetsita nago ideologiak eskatzen duela

(gutxienez) hainbat zentimetro luze den

kointzidentzia eta indarberritze amaigabea

 

Espero dudana da gure bizitzek

bilera honi emango diotela

hasiera