Ihardestearen artea

Lehen erantzuna okerra zen,

bigarrena barkamen-eskaera;

hirugarrenak azazkalak moztu zituen

Vatikanoko harmailetan,

laugarrena erotu zen,

bosgarrenak

gorrotoa elikatu zuen haur bikiez erditu arte,

seigarrenak liburu bat idatzi zuen,

zazpigarrenak

salaketa ipini zuen Auzitegi Gorenean,

scout nesken gailetak zergapetzearen aurka,

zortzigarrenak prentsaurrekoa eskaini zuen;

bien bitartean lau haurtxo beltzek

piketea egiten zutelarik New York hirian,

hil ahal izateko ospitale-ohe eske;

bederatzigarrenak eta hamargarrenak

Oposizioari Mendeku egitea zin egin zuten,

hamaikagarrenak hilobiak eraiki zizkien

Betiereko Egiaren ondoan,

hamabigarrenak

funtsak bideratu zituen hirugarren munduko herrialde batetik

Central Harlem sendagilez hornitzeko,

hamahirugarrenak

uko egin zuen,

hamalaugarrenak kokaina eta hirustak saldu zituen

Sagar Handiko zirkuan, komun baten inguruan;

hamabosgarrenak

galdera aldatu zuen.