Ene barrioa II

Perry Smith

Modernitatearen profeta berriak

iritsi dira ene barriora.

Beraiek diote kontzientziaren deiari

erantzunez gero ez dela ongi bizitzen.

Barrioko artista kontzeptualak Londresetik bueltan

Club bat jartzea erabaki zuen;

ene barrioa kosmopolitago bihurtu asmoz.

Psikoanalistak dira

egungo jende modernoaren konfidenteak

Rolling Stone batzuk ere badira ene barrioan,

Babesa emango dien irla desiratua

Aurkitzeko esperantza urria duten naufragoak dira.

Nihilistek sua eman zioten

Prosegurreko furgoi blindatuari

Irakurri dut barrioko graffitiren batean,

kaioletan  dauden txoriek ez dutela abesten eta

bizitza osoa garrasika laguntza eskatzen

igarotzen dutela.

Barrioko Caritasen egoitzan,

junkien seme alaben begirada

lauso eta galduek ezin dute arreta mantendu

puntu jakin batean.

Boluntario batek gehiegi ikusi dutenaren

Begirakunea dutela esan dit.

Bertolek semeari esan zion, zintzo izateko

eta mesanotxean zuen 10 hatzetako labana inoiz ez hartzeko.

Baina semeak, Xabierrek, labana hartu eta beste ume bati

bihotzean sartu zion pertsonak nola hiltzen ziren ikusteko

Gero komunikabideek ene barrioaz ariko dira;

bertan probetxuzko gauza gutxi gertatzen direla esanez, e.a....