Irten ginen

 

Irriak harrikatu eta kraskatzera irten ginen.

Lorategiak etxe erauzien hondakinez estaltzeko asmotan.

Autoak eta kamioiak errepideetatik egozteraino atzamarkatu asfaltoa.

Abiadura sinestezinetan deskarrilarazteraino bultzatu trenak.

Begirada hutsaren indarrez induskatu eta uzkaili mendiak.

Izutu erreketako urak. Ihesera behartu itsasoa.

Hodeiei su eman. Zerua erre.

 

Ezinaz gozoro etsita, etxe barrura itzuli,

perplexidadea beirazko arasa gardenetan pausatu

eta poesiari eman genizkion

gure begi-barru ordurako jada heriotzaren ilunbeez lanbrotzen hasiak.

 

 

© Juan Luis Zabala

 

 

"Hautsia natza" orrialde nagusia

www.susa-literatura.eus