Baloiak espaloi orotan

 

Futbol partida garraiatzen zuen kamioiak

bertso lerro okerrarekin estropozo egin zuen hartan

asfaltozko mihiak asaldatu egin ziren une labur batez,

urteetako asperdura odoldu eta hala ere geldoa astinduz,

ezti-ezti haatik,

maitasun aitormen giroko hasperen arin batez.

 

Kamioiaren gurditik soldadu gisa jauzi egin balute bezala,

harrezkero beti daude baloiak espaloi orotan

gure oin zalu eta trebeen aiduru,

dekretuz ezarritako burla erotiko baten larru atsegingarri.

 

Horrelaxe da eta gustatzen zait,

gustatzen zaigu, maite dugu

hala bertso lerro okerra ezagutu ez dutenek

nola hura egunero,

zoriontasun ariketa premiazko eta saritua bailitzen,

laino-lilura leunez eroso ahazten dugunok ere,

teleaparatu bizi baten barruko balbulen artean kiskalitako

doinu zaharren oihartzun lizundua ahazten den bezalaxe.

 

 

© Juan Luis Zabala

 

 

"Hautsia natza" orrialde nagusia

www.susa-literatura.eus