Maitea besarkatzean
Maitea besarkatzean
hezur multzoa irudikatu nuen,
itsu, ezjakin, gauzaki huts,
haren haragiaren barruan.
Urrutiratu egin nintzen
besarkadatik, maitearengandik.
Desartikulatu egin nuen unea.
Izate biluzian sentitu nintzen,
hutsean ilun amildua.
Indarrez, etsi-etsian,
bizia estutu nuen beso artean,
edo heriotza akaso, bizi-bizi. |
© Juan Luis Zabala