Mahai gainean

 

Mahai gainean utzi ditut

betaurrekoak, erlojua eta bolaluma,

ea elkarren arteko solasean

entretenitzen nauten.

Baina ez dute hitzik esan.

Begira geratu natzaie,

luzaz, malenkoniaz,

urrutiramendu triste eta poetiko batez,

zintzotasun sideralez.

Konturatu naiz autoerretratu partzial bat

dudala mahai gainean, begien aurrean.

Neure ortopediaren erretratua.

Hain aparteko, hain neure.

Hain arrotz, hain ni neu.

Hautsia natza hortxe,

desmontatuta, desartikulatuta,

deskonektatuta, deseginda.

 

 

© Juan Luis Zabala

 

 

"Hautsia natza" orrialde nagusia

www.susa-literatura.eus