Gaupasa beti

 

Ilargiaren nekea begietan,

egunkari berrien distirari

aurre egin ezinik.

Kristal hautsien zorrotza

munduaren zapata-zoletan.

Erraietatiko isurkien narda

giza-izatearen estoldetan.

 

Zer begirune edo hipokrisia da

garbitzaileei gu beren ontzietan

sartzea galarazten diena?

Ez da zuzena.

Geure kabuz barneratu behar genuke

zabor-arte abisalaren gau artifizialean,

gizarteak eta egunak

sekula emango ez digutenaren bila.

 

 

© Juan Luis Zabala

 

 

"Hautsia natza" orrialde nagusia

www.susa-literatura.eus