Galderaren magal iluna
Ziurtasuna ezin jasan
eta zalantzara jotzen duten horietakoa naiz.
Perplexidadea maite
eta galdera bila galtzen dut
bizitza merke honek uzten dizkidan aisi tarteak.
Galderaren magal iluna bilatzen dut
erantzunak hilda jaiotzen diren mundu argi honetan.
Galdera bat bilatzen dut
mirespenez begiratzen dudan kamioi atoidun bakoitzean,
inoiz kamioia ukitu gabe,
inoiz kamioia hil gabe,
galdera bat abandonatutako fabrika zaharretako hondakinen artean.
Galdera bat iruditzen zait
zubi bakoitza ibaiari buruz,
isil, geldi eta alferrikako,
galdera handi bat
arratsean iluntzera jotzen duen hiriaren tristura orokorra,
kaleak eta etxeak estaltzen dituen ganga erraldoia.
Galdera bat da bizitza,
hala nahi izanez gero behintzat,
erantzun mortuen gainetik egindako paseo perplexoa,
haustura irakurtzen ahaleginduz gero,
distantziaren betaurrekoak jantzita. |
© Juan Luis Zabala