Dena ilun ikusteko joera

 

Dena ilun ikusteko joera,

barne-filtro orolanbrogarriz.

Erortzeko gogo zorabiagarri eta atsegina,

azken muturreraino gaisoturik

asfalto gainean abailtzeko seta,

beso-zangoen astinduz ingurua jipoitzeaz

aldez aurretik gozoro etsita.

 

Adierazi ezinen ederra barne-muinetan.

Eskerrak haustura hauek badarik ere

gordetzea daukagun,

distantziaren bermea,

irribarre arinen ihauterietan

zinez geu izatearen arnaserako

barne-leihoen euskarri.

 

 

© Juan Luis Zabala

 

 

"Hautsia natza" orrialde nagusia

www.susa-literatura.eus