Anton Abbadiaren Koplari Guduak

        Orain dela 150 urte, 1853ko abuztuaren 29an, jokatu zela lehen Lore Jokoa, Anton Abbadiak antolatutakoa, diote kronikek. Data hori hartu da estreinaldi ofizialtzat, baina ez dirudi hala denik. Patri Urkizuk prestatutako Anton Abbadiaren Koplarien Guduak (1851-1897) liburuan ikus eta irakur daitekeenez, 1851ekoa da lehena, hain zuzen ere Joanes Oxaldek Kantu berriak Urruñeko pilota partidaren sujeten gainean emanak poemarekin irabazia.

        Lore Joko edo Koplari Guduek tradizio oso aberatsa eta eragin handikoa izan dute gure literaturgintzan, ez bakarrik XIX. mendean, baita XX.ean ere. Patri Urkizuk prestatu duen liburuan 400 poema-sorta datoz, XIX. mendeko 45 urtetako edizioei dagozkienak, Lapurdi, Zuberoa, Nafarroa, Gipuzkoa eta Bizkaian jokatutakoak. Parte hartutako autoreen zerrenda handia da, hala kopuruaren aldetik nola izen batzuek duten itzalaren aldetik ere.

        Eusko Ikaskuntzak kaleratu zuen Patri Urkizuk prestaturiko liburua, Euskaltzaindiak eta Eusko Ikaskuntzak Anton Abadiaren omenez antolatutako jardunaldien baitan (hiru liburu kaleratu zituzten). Liburuak, 400 poema-sortaz gain, Patri Urkizuk berak egindako hitzaurrea dakar, non ondo asko azaldua datozen Koplari Guduen inguruko xehetasunak. Badakartza, halaber, zenbait egileri buruzko datu batzuk eta poema-sorta guztien zerrendak, urteka eta lehen bertso-lerroaren arabera antolatua. Baita zenbait aire ere.

        Liburua osorik daukazu Eusko Ikaskuntzaren webgunean, pdf formatuan. Guk ere hemen eskaintzen dizkizugu poemok.

        Segidan ematen dizugu, baita ere, egileen zerrenda alfabetikoa, parte hartu zutenen garrantziaz ohartarazteko baliagarria, hor aurkituko baitutzu Etxahun, Iparragirre, Dibarrart, Zaldubi, Duvoisin, Elissanburu, Hiribarren, Etxeto, Otaño, Arrese Beitia, Lopez Alen, Iraola...

  KOPLARI GUDUETAKO EGILE ZERRENDA