BIDAIARIA

(Bidaiariaren gogoeta ostatuko leiho aurrean)

Ez du kristalik lausotzen haizeak,

geure hatsak baino

iragan egunek

osaturiko beidura

ilun hau.

(Bidaiariaren gogoeta ostalarisaren alboan datzala)

Bi eskukada hegal

ezinezko notak amesten

larruazaleko pentagrama hautsian.

(Bidaiariak ostalarisaren galderari erantzuna)

Gelako epeltasunak

leunki laztandu masailotan

datza

bideko haize zorrotzaren

oroitza.

Oinak oroimen,

euretako zimurduretan

du idatzia

iraganak

bideetako lumaz

oroitzapen liburua,

zure eskuok

irakur bezate

orain.