Krokodil bat daukat bihotzaren ordez
Krokodil bat daukat bihotzaren ordez
1986, poesia
112 orrialde
84-398-6304-7
Itxaro Borda
1959, Baiona
 
2021, nobela
2012, nobela
2009, nobela
2007, nobela
2005, nobela
2001, nobela
2000, poesia
1998, poesia
1996, nobela
1996, nobela
1994, nobela
1991, poesia
1984, nobela
Krokodil bat daukat bihotzaren ordez
1986, poesia
112 orrialde
84-398-6304-7
aurkibidea
 

 

I

 

nere inguruko jendean begietan odolez hantu ibaiak

ikusi ditut, uranio urtuz loditu malko desesperatuak. artadi lehortuen

                errautsetan belaunikatu piztien orro basatiak eta ur orlegi

                irakinean igerika zabiltzan geroaren amets herabeak.

ikusi ditut,

                gela ilunetan kukubilkatu nahikunde suisidarioak eta arpegirik

                ez duten garratoinen hortz usteldu malatsak, edo ilusio

                transparenteen itzalean dirauten esku zimurtuak.

ikusi ditut,

                nehondik nehora zihoatzin tren metaliko hotz

                apokaliptikoak eta supermerkatu aberatsetan

                liburu sakratuak ebasten zituzten inguma beltzak.

ikusi ditut,

                gure herriko izpiritu handienen burumuinak ez jakitate

                konfortablean barna likido jori epel malgo

                debekatzale iduri ixurtzen zirenak ttanttaka.

ikusi ditut,

                biharraren ordurik alferrena tinkatuz besoan LSD

                pikura bat zegiten australiako kanguro lanpetuak.

ikusi ditut,

                hamalaueko gerlan hil soldado azkarren hezur gisuz

                hustu zurituak rock'n'rolla dantzatzen zutenak eta harrak

                zango mikroskopikoez tiroek larrutu lurrean ritmoa jotzen.

ikusi ditut,

                zakila gogortuz asetzen diren pentsamendu urdin

                bihurriak, eta gauerdiko fereka zorrotzak, eta debaldezko

                musu-ausikiak, eta haluzinazio dohanak, eta, eta.

ikusi ditut,

                ostegun arratsalde beroetan erreka ertzeko belar erraldoietan

                lasterka zabiltzan haur itsuen bihotz taupada hordituak.

ikusi ditut,

                Rio de Janeiro inguruan lehen kusiaren mahainean bildu

                Amadoren liburuak eta papelezko favelletan samba aireak

                entzunez ebandelio isilaren predikuak oihukatzen ari ziren metizak.

ikusi ditut,

                beste bi kusi New Jerseyko autopistetan Patterson eta Asbury aidean

                coca cola botoilak eskuartean izerdi hitzerditan otoitzean ari zirenak,

                gero Pattersonekoa zoro etxe batean zortzi hilabetez

                horma mutuei katez estekatuko zuten.

ikusi ditut,

                hamabi urte: eztitasun beharra zuen neskatxari

                sabelpeko oihana zartatu zitzaion eta sumendiak odoletan

                emaztetasunaren magma malinak ama!

ikusi ditut,

                hospitaleak arsenal nuklearrak kartzelak hotelak:

                lehen aldikoz larrua jotzerakoan gizon maitatuaren

                ezina, haren ahalgea honen trauma.

ikusi ditut,

                zakar ontzira, no future no fun, aurdiki diru mordoak,

                Platonen eta Danteren memoriak lohian ziliportatuak

                hausteko zorian alkoholez bete basoak betiko erregai.

ikusi ditut,

                Indietako pariak bezala erakustoki arkaikoetarik

                kanporatu poetak edo idazleaz, mesprexuzko keinuak

                irabazleen begi konformistetan.

ikusi ditut,

                kontsolatu, analisatu, ezkutatu behar ziren pertsonak

                eta lasaitu ondoren

ikusi ditut,

                planetak, izarrak, kometa buztan luzeak esperantzak

                zorabiatzen eta ondartza erromantikuak mihi lehortuz

                milikatzen, lekatzen, irri debaldeetan oparoki kilikatzen...

ikusi ditut,

                jazzmen trebeak Acapulkoko night clubetan lur ikarak

                probokatzen Artauden orroimenez Mexicon Peyotl.

ikusi ditut,

                Wall Streeteko merkatuan dolorearen baloreak

                ilargiaren mugimendu maitekorren arabera goititzen

                edo beheititzen noizean behin.

ikusi ditut,

                kakiz jantzi homo mititarensis delakoak homo sapiens

                xoilen gorpu labanez txikituak, xehatuak, bularrak,

                eskuak, buruak, jaten Pariseko errestauranteetan...

ikusi ditut,

                gaztelu abandonatuek, ondartza desertatuek,

                ibai agortuek eta izarrintzak busti erdi aroko loreek

                beren ohe inprobisatu gordeetan hainbeste amodio egile

                herabe gerizatzen zituztela, beti asko, never more.

ikusi ditut,

                Kilimandjaroko elurrak eta Iruñeako Marcelino ostatuko

                mahainak, Hemingway. Gero ikusi ditut diru edo ohore

                puska bat eskainia zitzaioten intelektualak, ulu beltzak iduri,

                gobernuaren behi kaka metaren gainean pausatzen, goseti...

ikusi ditut

                Txinako poeta gazteen kaligrafiak Tien An Men plazako

                hormetan koloreztatuak: eli eli lamma sabachtani!

                Kerouac irakurtzen egon naun etxean maite hire beha,

                baina ez hintzen nere eternitatera bakarrik etorri: senargaiarekin.

ikusi ditut

                harri zabal bakartietan larrosa gorrien zain sapaz itoak.

                Irrati komertzialaren gaueko azken musika aditzean

                hiri pentsatu nian: badoak denbora, badoak bizitza,

                badoatzik atseden beharraren

                zizta hurbilak eta etsipenaren urrezko

                tronpeten hotsak.

ikusi ditut

                ni bezalako mila hitz harro. Poema honen bihotz nuklear

                urratu eletronikoarekin gorputz materialari moztu esperantza

                ixilaz aseko naiz egun bihar etzi noizbait, buru huts eta zoro.