EZ DUT BAT BUENA EGITEN

Sukalde lanetan

—beti izan naiz traketsa—

ez dut bat buena egiten.

Ezin izaten dut asmatu

noiz arte utzi sutan

egosten edo frijitzen jarritakoa.

Hurkoarekin harremanetan

—ez dut inoiz ikasi—

ez dut bat buena egiten.

Sukaldean bezala nabil beti,

beroaren neurri egokia

zein den asmatu ezinda.

Idazterakoan ere

—ohartzen ari zara, noski—

ez dut bat buena egiten.

Zeuk esan beharko didazu

ustezko poema hau hotzegi

edo kiskalita zerbitzatu dizudan.