Lazunak azkazaletan
Lazunak azkazaletan
2021, poesia
104 orrialde
978-84-17051-66-2
Azaleko irudia: Malen Amenabar
Oihana Arana
2001, Eskoriatza
 
 

 

NIHILISMO PERFORMATUA

 

 

Antzerkia haragia da:

besoak, begiak, hankak.

Antzerkia plazera da:

besaulkiak, begiradak, hanka-sartzeak.

 

Nik ere amestu izan dut opera handiekin,

nik ere ordaindu izan dut

—eta ez gutxi—

areto hutsak usnatzeko,

isiltasunaren oihartzunari

momentuan asmatutako gezurtxoak xuxurlatzeko.

 

Esan diezadakete ez dakidala teatroaz ezer;

Shakespeareri Hamlet irakurri niola, bai,

baina beste ezer ez dakidala.

Jakin edo ez jakin.

 

Esan diezadakete ez dakidala teatroaz ezer

ez diodalako egundo begietara begiratu,

eta begiratu baldin badiot ere ez;

dena ez duelako begiekin esaten.

 

Akaso ez dakit ezer, eta ezin dut jakin, ezin da jakin.

 

Edo uneoro nabil antzezten.