IRAGARKI HURA

 

 

Zaldia zuria zen eta neska ilehoria.

Non edo non bitxiloreak zeuden,

neskaren gorputzean itsatsita edo.

Itsasondoan zebilen pasieran zaldi gainean,

adatsak biluzia estaltzen ziola.

 

Pattar baten iragarkia zen.

 

T.k esan zuen Lady Godiva zela.

Baina beraneante bat ere izan zitekeen,

eta hondartza langartsua, Karraspio bera.

 

Haragi koloreko kuleroak eskatu genizkion amari

erdijainkosak sentitzen hasteko.

 

Lady ausartia zen, zamariaren uhalei helduta.

Lady dezentea zen, nabari zitzaion apaltasuna.

Espartzua eta biberoia besterik ez zituen falta

hamar puntu lortzeko:

pattar hura gizonen kontua zen.

 

Gero eta gero jakin genuen jatorrizko Godiva

Lady Godgifu zela, gift of God (ez gizonena),

eta larru-hutsik zeharkatu zuela Coventry hiria

jaun senarrak zergen demasia laxatu zezan.

 

Lehenbiziko aldarri-biluzia estreinatu zuen Ladyk,

umiliazio behar zuena iraulkatuz,

gorputzaz eginez protestaren bandera.

 

Zer esan dezaket horren harira?

Ez dut nire azalaren zentimetrorik erakusten

hondartzan ez bada; eta usadiozko moduei jarraiki.

 

Eta bide batez, zer berri dugu honetaz?

Atlantida hondoratu zen. Antartida urtuz doa.

Non egingo dituzte gure ilobek barbakoak?