Tractatus
Tractatus
2014, poesia
128 orrialde
978-84-92468-57-7
azala: Laura Esteve
Jule Goikoetxea
1981, Donostia
 
 

 

ABISATU EZINIK

 

Isiltasunez alboratzen dut ahotsa

zu hartzeko hausnar

dimentsio bideraezinen atari oroitzen zaitut

hiperkubo batean amestuta

neurrigabekeriaren etc guztiek eskoltatua

sekretuan eztabaidan orain

laxo elkarrizketan

bukaezina den zigarro baten kea iduri

        kinka okerra jatorriz

        badaezpada berrirotua

        kemen gorriz

eta intziri urratu baten laguntzan

nire erraietan aterpetua,

hondale arrarotu

zulotze sadomendekati

eta hotz izerditu

herreneko triskantza lau honen

dimentsio miserableetara

itzuli nahi ezik.

 

Ilargi kanpaiak

borborka espazioan

eta ni zu abisatu ezinik

nirekin zaudela

eguzkia gonbidatzeaz ahaztu zen

egun honi kateatua

        nire begipeetan tolestu da dena

        eta iltzatuak dauzkat malkoak

Lurra den

ama puta honen

kirio gatzatu eta

zarratatuari.