Sinplistak
Sinplistak
2012, poesia
120 orrialde
978-84-92468-42-3
azala: Alain Urrutia
Hedoi Etxarte
1986, Iruņea
 
2021, poesia
2008, poesia
 

 

ASKATASUN KALEAN

 

 

Zinpeko berria destinatu dute

Askatasun kaleko Eroskin.

Aurreko zinpekoak ez zuen

adi eta ganoraz lan egiten.

Bere patxadaz eta pasibitateaz

lasaitasuna segurtatzen zuen saltokian.

 

Gaur Askatasun kaleko Eroskin

sartu naizelarik, belarrietan kaskoak,

keinua egin dit zinpeko berriak.

Ezikusiarena egin dut.

Esnekien sailera joan naiz,

jogurtak eta gazta hartu ditut.

Zukuen eremuan saskiratu ditut

olibak, dilistak, pasta freskoa.

Zinpeko berriak keinuak egin dizkit.

Ezikusiarena egin dut berriz.

Orduan fisikoki ukitu nau eta

nik kasko bat kendu dut esateko:

«Zer demontre gertatzen da!».

Eta zehaztu dit: «Barkatu baina

zakuak sarreran utzi behar dira».

Bizkarrean daramat zakutoa.

Zakutoa kentzeko keinua egin dut.

«Zerbait ostu dudala uste al duzu?

Begiratu barruan». Ez du begiratu.

Ez dut zakua sarrerara eraman.

 

Atzetik segitu nau, hamar bat metrora.

Laboreen zonaldean so egin diot.

Begirada beheititu du. Gerturatu eta

lotsarik batere gabe galdetu diot:

«Zerbait lapurtzekotan nagoela uste duzu?».

Ezetz erantzun dit: «Kontua da lehen

jendeak laboreetako jostailutxoak

ebasten zituela, baina orain gailetak».

Harrituta eskatu dizkiot azalpenak:

«Jostailutxoak ebatsitakoan ez zenituzten

zakutoak miatzen, baina orain erregistratu

egin behar gaituzue gailetak ostuz gero?».

«Bai, halaxe da» esan dit. «Ados» esan diot.

 

Askatasun kaleko Eroskin

zinpeko berria destinatu dute,

Europako Banku Zentralak bidalia,

Askatasun kalean austeritate plana

tentuz garatzen ari ote diren neurtzeko.