DENA

                        Niri dagokidanez,

                        gera gintezkeen medusatan

                                        Gottfried Benn

Dena nahiko nahasia izan zen,

sotila eta potentziala hasieran,

ikaragarria eta erreala gero.

Pixka bat denetarik jazo zen,

denak hartu zuen denaren forma

eta denetarik zabaldu zen denean.

Bizitzarekin gertatu bezala,

antzera hedatu zen heriotza ere,

gureaz beste zirrararik gabe, baina

tartean konkrezio deigarriak utziz.

Gehiegikeriak ziren, baliteke, eta

aski zitekeen dena bi medusa haien

lehen laztanean amaitu izan balitz.

Akaso errepikapenak, bertsioak,

besterik ez gara izan gerora.

Haragi zauritua baino ez, eta

maiz, ezta haragia ere, baina

gu izan gara, dena den. Gu

hemen eta orain, behin eta berriz.

Ezer ez kasik, eta hala ere zerbait.