BIGARRENEZ HADASSA

Bost urte igarota

ostera ere ikusi zaitut gaur

Hadassa

zeure etxean egin dizudanean

bisita,

eta atzera berriz usaindu

bizi zaren lautada berdeko trengeltoki zahar horretan

Anbotora igo ondoko

lurrun gozoa,

izerdiz, haize-zirimolez egina,

pil-pilean bihotza,

bakea begian.

Eta ez dio ardura

zein luze izanen den

ikusiko ez zaitudan denbora,

zurrunbilo baten barruan izan arren,

zureganainoko bidea

ez baitzait inoiz ahantziko,

ez eta oroimenean amoztuko

zure gorputza, zure bihotza

mugatzen dituzten

hegi zorrotzak.

Ez, ez dio ardura

zein urrun dagoen

zu zeu ostera ere ikusteko tenorea,

Jerusalem zaharreko

kale estuetatik bezala

haize leun bat baitabilkit

zainetan zehar,

zure oroitzapena beti ere

freskatzen didana.

Oi Hadassa,

Hamburg-eko lore beltzarana,

emakume sendo,

neska panpoxa,

eskerrak

zu zeu ezagutzeko aukera

izan dudana.