SEKRETUAK

Beti kontatzen zenituen sekretuak doan.

Beste azal baten kantoian jasotako

limosnaren mezuarena,

zubi hartako amildegian

heriotzaren musua sentitu zenuenekoa,

goiztiri bortitzenetan

etxeko epeltasunak negar eragiten zizunean,

zure bihotza dagoeneko brontzezko kutxatilan

gordetzen duzula gauero,

musuen enkantean

preziorik altuena ordaindu duzula beti,

bilduma osatzen ari zarela,

eta orban askoren egile maltzurren izenak,

drogak zuritu dituen

patu txarreko lagunen malkoena,

heriotza askoren gorrotoaz...

Beti kontatzen zenituen

zure sekreturik gordeenak doan,

iraganeko inventarium iluna, curriculum isila.

Noiz kobratuko didazu?