URRIAK 3 MOMENTU EBOLUTIBOA

                                Mundu bat zen berez sekula amaitu

                                nahi ez zen musu hura.

                                                                Jon Mirande

Lo egitea egurrezkoa da.

Gau osoa arrainak pizten

eta igelak eranzten ibili ondoren

iratzargailuak jo zuen

eta begiak erne zitzaizkien.

Gisèle ohe puntan eseri zen

amildegi hura, limite hura haztatuz

eta Gisèle lepoz sano ederra zela erabaki zuen.

Sano ederra.

Goizaldea gelara sartu zen

bere dantza konpainiarekin.

Atsegina zen Gisèle lepoz ikustea.

Gisèle ikustea.

Laztandu egin zuen

modu berri batean hala ere

tertziopelozko grabitate baxu batean

ilargitik heldu zaizkigun

irudi bakarretan baino astiroago.

Irribarre dardaratiz musu eman zion

sorbaldako puntu arbitrarioenean

eta bat-batean ezpainak

klarionez bete zitzaizkion

eta bat-batean bezperako tristura itzuli zen

izututa

besoekin inguratu zuen Gisèle tximistorratza

aingira elektrikoa

guraizezko azala.

Bilatuz

kaimanen hazitegi bat aurkitu zion pubisean.

Isiltasun polizial sakon hartan

gelako gauzek esanahi inmediatoa galdu zuten.

Petrolio orbanaren erdian Gisèle

argazkietan sutan harrezkero

eta milaka metrora Miguel Hernández ziegan

edo katuen bizarrak basamortuan

kontrabaxuetako hariak ziren.

Ilea miazkatu zion negarrez,

harriak miazkatzen diren antzera.