Lur bat zure minari
Lur bat zure minari
1995, poesia
68 orrialde
84-86766-58-3
azala: Nicolas de Staël
Jose Luis Otamendi
1959, Azpeitia
 
2022, poesia
2019, poesia
2014, poesia
2007, poesia
2000, poesia
1999, narrazioak
1990, poesia
1987, poesia
 

 

Hustutako herriak

 

Etorriko zarete hustutako herriak hartzera

Eta kaleen izenari erreparatuta omendu eginen gaituzue

Esango duzue erratu egin garela

Baina herkidego borondatea aitortuko diguzue zeuen ohar-kuadernoetan

Etorriko zarete eta erreten bazterretan botatako giltza sortak batuko dituzue

Hatzmarkak bilatu inoiz guk maite izandako gorputzetan

Eta jabetza agiriak berritu

Jabe berriak izango dituzte aurrerantzean zorriek eta egunsentiak

Poliziak zainduko ditu gure poemak

Aspaldiko ereserkiei aspaldiko mintzairari lotuko dizkiezue zeuen gogoak — arima setiatuak —

Etorriko zarete eta mendigain elurtuak miatuko dituzue

Zorionetik ihesi mugalari izuturik badenentz

Eta esango duzue « aurkituko dugu bake hitzarmenak egoki

        zeinek idatzia," bihotza! " izango da estreina

        jalgigo zaigun maitasun hitza »

— Aitorpen sakon bat eta libertade tolesgarria

Ezpondetan gorde eskutitzek murgildua —

Etorriko zarete eta kanposantuan ezarriko dugu azken gotorlekua

Begibiko fusilek idazmakina totelen pare

Tekleatuko dute zuen bizkar hezurren kontra

Beste edozein sasoitan baino arrotzago mintzatuko gatzaizkizue

Hilarrietako zenbaki bikoitietarik

Eta esango duzue « mende hartu ditugu, amaitu da belaunaldi hori, hilak defenditzearren idazten zuten barren »

Eta zerraldoen talaietarik begiztatuko dugu bailara keetan

Eta ezerbage — min erre bategaz —

Suari emandako geure etxeetarantz jaitsiko gara