Goiza

Laino meheak gorde itsasadarra

Izkutauta liluren ibarra

Arboladi goxoez betea

Bapor hordi baten eskifaia

Hegal bluek apurtuz sabaia

Argiari zabaltzen atea

Urrutian —zeruezpainak more

Ekiaren armiarma sare—

Iragazten dena, ozonoa

Dardaraka, euri da zilarra

Han-hemenka bustiz artilarra

Gar zuritan blai ozeanoa

Ez dager hor ezein haize oihal

Oroimenak ikutu, doi-doi, ahal

Aintzinako ikur zurbilak

Eremu urdin, antigualeko

Gaur inoren morroi eta menpeko

Ainitza adi oihartzun galduak!

Sua baino besterik ez goiza

Eguzkia nagusi zikoitza

Itsasgaina barea belardi

—Argonauta eroen erruta

Aspalditik hor ezabatuta—

Nork ote zaitu bide-zohardi.

w1988