8 GELA

Nire dentista mozkorra da.

itsumustuan sartu da nire gelara hortzak

garbitzen dizkidaten bitartean:

«hi, kabroi hori! oraindik

idazten al dituk istorio zikinak?».

«bai».

neska erizainari begiratu dio:

«ni eta kabroi hau, biok

ibiltzen gintunan posta-bulegoan lanean

hortxe, terminalaren ondoko eraikuntzan!».

erizainak ez du erantzun.

«begira guri orain! hanka egin geninan

handik; hanka egin genian zulo horretatik,

ezta?».

«bai, bai...».

arineketan joan da beste gela batera.

neskatxa politak kontratatzen ditu,

nonahi daude.

astean 4 lanegun dituzte eta gizonak

Caddy beilegia dauka.

8 gela dauzka egongelaz

gain, guztiz ekipaturik.

erizainak nire gorputzaren kontra jarri du

berea. sinestezina da

bere bularra, izterrak, bere gorputza

nire kontra jarrita. hortzak garbitzen dizkit

eta begien barrenera so egin:

«min egiten dizut?».

«ez ez, aurrera!».

15 minuturen buruan dentista bueltan da:

«aizan, ez luzatu gehiegi!

zer gertatzen da, dena dela?».

«Doktore, gizon honek ez ditu hortzak garbitu

5 urtean. nazkagarriak dira!».

«tira-tira, amaitu berarekin! emaion

beste zita bat!».

korrika irten da.

«nahi al zenuke beste zita bat».

begien barrenera so egiten dit.

«bai», esaten diot.

gorputz osoa utzi du jausten nirearen kontra

eta azken marruska batzuk egin dizkit.

guztira berrogei dolar kosta zait

x-izpiak barne.

baina neskak ez zidan inoiz

bere izena esan.