—231—

NEMESIO ETXANIZi

Donostiara

Caracas, 1966-I-4

        Adiskide mami:

        Berandutxo, bainan erregeak eztira oraindik iritxi eta, aiekin bialtzen dizut nere urteberrirako agurra, eguberriak onuzkero igatu xamarrak ditugu-ta. Ar izkitzu beraz ene zorionik bete eta ugarienak asita daukagun urteberri ontarako, eta goi ta beko ondasun eta ontasunez gainezka igaroko al duzu. Orretxek dituzu zure opakundeak. Barkatu ain berandu idozkitzulako.

        Zure gutunak asko ta biziki poztu ninduen batez ere Orixeren omen liburuaren berri ona ekartzen zidalako. Gainera bost ale igorri dizkidatela diozu; lau beintzat saldu egingo ditut, garesti saldu ere gure maisu aundia zanaren ilobirako diruak biltzeko. Nik uste beste bost igorriko balizkidate ere, aixa salduko nitukela, bainan nik berriz esan arte ez bialdu, biar bada bostok baino geiago salduko ditut eta liburua eskuartean daukadanean erosleei erakusteko. Eta jakinaren gainera eskatuko dizkitzut liburuok. Eztaukazu zuzenbidea zertan aldatu; gure etxaldaketa errexa izan da; azkenean amaikagarren bizitzatik amargarrenera jetxi gera; orixe izan da guzia; zenbakia aldatu ta kitu 110 bearrean 100 ipini eta beste guztia berdin. Ala ere buruausterik naiko eman zidaten nere liburuek eta orain emen nabil erdiak ezin bilzturik denak gelditu baizitzaizkidan euren lekuetatik kanpo. Ala ere txarragoa izango zan etxetik urrunago atera izan baldin bagina. Badakizu beraz; zuzenbide berdina, 110, 100 biurtuta. Besterik deus.

        Gabonak naiko poliki eman ditugu, eskerrak gure umetxo zoragarriei. Ainbeste gabon-abesti ikasi ditute Euzkadi-Ikastola ortan danak euskeraz eta alako Jaiotza irudiak agertu ere bai, dena euskeraz. Eta gureak eztira atzean gelditu. Entzutekoak dira izan ere aiek abesten dituten abesti zoragarriak. Lekuonaren gabon-kanta geienak buruz dakizkite. Ortxen agiri da zenolako lanak egingo genituken ikastola eskuartean bagenuke; amar urte baino lenago Euskadi osoa Euskalerri zoragarri biurtuko genuke batez gaur ortarako dauzkagun errextasunekin, zinemak dirala, irratiak, telikuskinak, izparringiak eta abar. Noiz izango ote dugu zori aundi ori? Madriletik eta Parisetik beintzat eztigute olakorik laketuko, ez orixe eta gerok, txikiegiak izan gerez iristeko. Alare esana da eztagoela etsai kaxkarrik, eta ori erdaldunak, gure etsai apartak esan daroe, beraz gu ere ortara ezkero, ez gera kaxkarra, kontuan artzekoak baizik.

        Oraintxe irakurri dut Txillardegiren liburu berria: Huntaz eta hartaz. Lan sakonak dakazkinak eta ederki idatziak; ainbeste h-ek begiak lausotzen dizkidatela.... bestela benetan irakurgarria liburutxoa. Beinipein gazteok exenplu ederrik ematen die gure politiku zarrakituei, inoiz ere euskerarik lumartean artzen ez duten oriei eta artuko ere ez. Liburu au ezpaldin badaukazu, neonek igorriko dizut bertatik. Esan beraz.

        Arpideak ordaintzeko garaira iritxi naiz, eta bigarren ama bostekoak beteko du egin bear hori ezpaitut orain txanponik. Onaindiaren iritzia irakurri Zeruko Argian Hiru Hiztegietaz, eta dionetik Estornesen bigarren liburua ere agertu da. Igorri esaidazu baita Lekuonaren Poesia Vasca au (Literatura Oral dalakoa) au ere ezpait zait oraindik iritxi. Anartean, adiskide, ar ezazu besarkada sendo bat, eta asteburuko adiskide oneri nere opakunderik one(na)k urte berri ontarako. Agur adiskide.