—16—

JOKIN ZAITEGIri

Guatemalara

Paris, 1950-VII-18

        Agur adiskide laztana:

        Aspaldion zure berririk gabe naukazu. Jasoko zenitun noski, Garagarrilaren 13ko nere idazkia baita ere Bach aundiaz bialdu nizun lantxoa. Arrezkero, garagarrilaren 29an, Euskaldunak Orixeren poema argitara berria bidaiez igorri nizun. Baliteke idazti au oraindik ez jaso izatea, itsasoz igorri bainizun, egazkinez garestiegi zalako.

        Gaur ordea, beste zerbaitez mintzo bearra nauzu. Nere adiskide Zugaditar Andoni, izenez beintzat ezagun duzulakoan nago. I.R.O. Laterri-arteko eralguntzara zuzendu da, Ameriketara joateko diru-laguntasun eske. IROri berriz, Guatemalara dijoala esan dio, orko igarobidearen jabe baita Zugadi jauna. IROk Guatemala urian bere ordezkaritza dauka zuzenbide ontan kokatua:

        Sr. D. Yves Verroy

        I.R.O.

        4 av. Sur 15 Street 6

        Guatemala (Uria)

beraz, noski baino noskiago, emengo IROk orkoari idazkiz galdetuko dio Zugadi jaunak Guatemalan lanpide edo bizibiderik duanez, areri eta aren sendiari ibilaldia ordaindu baino len. Or ba, Zugadik nai du norbait zuzendu daitela orko IROren artezkari edo ordezkariaren gana, benetan Zugadik Guatemalan lanpide edo bizidea duala esateko, onek emengo IROri adirazo dezaion bere erantzunean, eta orrela IROren laguntasuna izango Ameriketarako bere ibilaldia ordaintzeko. Ez da,seguru be, Zugadi Guatemalara joango, onelakorik ez esan orko ordezkariari, baina bearbearrezko du ordezkari orrek emengo IROri onez erantzun dezaion edozein Amerika-laterrira aldatzeko ere. Beraz, zure eskuetan uzten dut ardura ori Zugadik erantzun egokia artu dezan IROn bitartez Verroy jaunak emanda. Zugadi bere emazte ta ogei ilabeteko alabatxua lagun Ameriketaratuko da. Aurretiez eskerrik beroenak dagizkizut, bai eta Zugadi nere adiskide minak ere.

        Gaurkoan lantxo bi bialtzen dizkizut bata nerea Alos-Torrea argitara berria duzun idaztiaz eta bestea Miranderen olerkitxo bat, surrealista xamarra. Bach buruz asi-lana amaiturik dut. Beste lantxo bat ere bai Euskaldunak Orixeren poemaz. Oiek beste egunen baten igorriko dizkizut. Noiz aterako duzu Euzko-Gogoaren bosgarren banakoa? Ederki jabetzen naiz sorbalda gainean daramakizun lor ikaragarriaz. Ongi dakizu emen nagoala al dedan guztia egiteko aldizkari orri laguntzeko: agindu besterik ez daukazu. Muxikatar Palgida, gure antzinako adiskidea nundik nora dabilen ba ote dakizu? Arri ere pozik idatziko nioke laguntasun eske, ongi dakit bada euskel lanak burutzen ari dana.

        Lengoan Altubek idatzi zidan eta zorionak edo, bialtzen zizkidan eskutitz goxo ta xamur baten bitartez.

        Laster erantzungo al didazu adiskide maite. Bitartean ene goraintzirik kartsuenak jaso itzazu.