Arribada
Gure ametsen almanaketik
Aldegindako orriak
Aurkituko ditugu kaian
Betiko karrika berriek
Anderegai inedito berberen
Eskaparateak erakutsiko
Erdeinuzko pipetan fumatuko ditugu
Etsaigo mutu
Iragankor guztiak
Beste portuan hasitako basoa
Hemen amaituko dugu taberna berberean
Marinel ezezagun baten alboan
Nahinongo irribarre
Berbera errepikatzen digula
Burdeletan badakite
Gure sosak
Aurpegi aldea urrezkoa duela
Eta atzekaldea sendimentala
Gure kanta sonanbuloen
Ustegabeko oihartzunek
Itzaliko dituzte goizaldeko argiak
Bihar egun honen
Hurrintzean esnatuko gara
Saihestu egin zen
Egunkari isurberako orri bat
Espektadoreak ginen
Ordu artifizialeko
Esku jokoan.
(Lauetatik lauetara, untziko egunkari baten orriak. 1928)