Arthur Rimbaud jaio zela 150 urte
1854ko urriaren 20an, orain dela 150
urte, jaio zen Charlevillen
Arthur Rimbaud. 20
urte betetzerako
idatziak zituen literaturaren historian tokia egin dioten lanak, eta
gerora bere beste lanek —Verlainerekiko harremanak, Afrikako bidaiek,
arma trafikoak eta abarrek— puztu zuten mitoa. 37 urte zituen hil
zenean, 1891ko azaroaren 10ean.
Mikel Lasak
ekarri du, batez ere,
Rimbauden lana euskarara. 1991n
Denboraldi bat infernuan liburu
seinalatua plazaratu zuen, eta
Poemak
kaleratu 1993an, poetaren
antologia bat. Liburu biak Erein argitaletxeak kaleratu zituen, biak
ere edizio elebidunak.
Literatur aldizkarietan ere agertu izana zen,
Mikel Lasaren
beraren itzulpenak 1987ko Literatur Gazetan, eta Joakin
Balentziak euskaratutako
Egunsentia,
Korrok-en kaleratua. Lasak berak bi liburuetako egindako hitzaurreetan
autorearen berri zehatza ematen zaigu. Aste honetan
Poemak
eta
Denboraldi
bat infernuan eskaintzen dizkizuegu.
75 urte betetzearekin batera, omenaldiz
omenaldi ibili da
Jose Luis
Alvarez Enparantza Txillardegi,
azken liburua kaleratu zuenean lehenbizi eta Koldo Mitxelena
Kulturunean antolatutakoak ostean. Azken ekitaldi hauen karietara,
webgune itzela
paratu diote Interneten. Bere biografia, berari buruzko testuak, ohar
bibliografikoak, bere lanen zati eta iruzkinak, idazle eta
pentsalariari buruzko azterketak, elkarrizketak... denetarik batu dute
bertan.
Harkaitz
Canoren Pasaia blues
Eleberri indartsu batekin etorri
zitzaigun 1999an, Susa argitaletxearen eskutik, Harkaitz Cano:
Pasaia
blues. Komando bat, polizi-ikertzailea, argazkiak, boxeoa,
iraganaren itzala, harremanak... osagarri askorekin bilbatutako ehuna
eskaini zigun idazleak. Bigarren eleberria zuen hau, hiru urte lehenago
Beluna
jazz argitaratua zuen, baina ordurako ez zen izen arrotza, eta
hainbat arlo jorratuta zetorren: poesia (
Kea behelainopean bezala),
narratiba re (
Telefono kaiolatuak),
zutabegintza...
Beluna jazz
oraindik orain gaztelaniaz argitaratua izan
delarik (
Jazz y Alaska en la misma
frase, Seix-Barral),
Pasaia
blues nobela eskaintzen dizugu orain osorik.
Efemerideak
1915 azaroak 4: Jean
Hiriart-Urruti hil zen Hazparnen. Labayru ikastegiak Ni kazeta-egilea
naiz liburua plazaratu du oraintsu.
1925 azaroak 4: Karmelo Etxegarai
hil zen Gernikan.
1999 azaroak 4: Inazio Eizmendi
Basarri hil
zen Zarautzen.
1940 azaroak 5: Imanol Irigoien
jaio zen Altzan.
1906 azaroak 7: Juan Benanzio
Arakistain hil zen Tolosan.
1924 azaroak 7: Patrizio Antonio
Orkaiztegi hil zen Tolosan.
1976 azaroak 7:
Fernando Aire Xalbador hil
zen Urepelen.
1990 azaroak 7: Justo Mokoroa
hil zen Bilbon.
1815 azaroak 8: Emmanuel
Intxauspe jaio zen Atharratzen.
1879 azaroak 8:
Sebero Altube
jaio zen Arrasaten.
1906 azaroak 8: Klaudio
Gallastegi jaio zen Elorrion.
1951 azaroak 9: Resurreccion
Maria Azkue hil zen Bilbon.
1885 azaroak 10: Abelino Barriola
jaio zen Donostian.
1925 azaroak 10: Jon Mirande
jaio zen Parisen.
Agenda
Emakumeak
idazle gaia izango dute jorratzeko
azaroaren
4an (osteguna) 19:30etan Durangoko Plateruena Kafe Antzokian.
Hizlariak:
Eider
Rodriguez,
Sonia
Gonzalez eta
Jasone Osoro.
Moderatzailea:
Laura
Mintegi.
Ixiar Rozasek
Gau
bakar bat antzezlana aurkeztuko du
azaroaren
5ean (ostirala) 20:00etan Bilboko Likiniano liburudendan.
Aurkezlea: Jose Luis Padron. Argitaldaria: Hiru.
Bihotz Bakartien Klubak
Zakil alu hori!
eskainiko du
azaroaren 6an (larunbata)
20:30etan Txantreako Euskaldunon Biltokian.
Euskal Idazleen Elkarteak antolatuta
Musika
eta literatura jardunaldiak burutuko dituzte Donostian
azaroaren
9tik (asteartea)
azaroaren
12ra (ostirala). Mikel Markezek
azaroaren 9an (asteartea)
Literaturatik
euskal
kantagintza berrira hitzaldia eskainiko du.
Azaroaren 10ean (asteazkena)
Pello
Zabalak
Soinua, hitzaren soineko izango du gaitzat,
azaroaren
11n (osteguna) Anjel Lertxundik
Hitza musika denean izango
du hizpide eta ostean
Juan Kruz Igerabideren irakurraldi
musikatua izango da. Azkenik,
azaroaren
12an (ostirala) Gari, Jabier Muguruza eta Jon Maia mahainguruan
izango dira
Letragile eta musikagile
gaiarekin.
Pako Aristik
Libreta horiko problemak
ikuskizuna eskainiko du
azaroaren 12an
(ostirala) 19:30etan
Donostiako Ernest Lluch kultur etxean.
Nahi
izanez gero, orain arteko Literatur Emailuak irakurgai dituzu Susa literatura
argitaletxeko webgunean.