Edorta Jimenez Atoiuntzia
Ipuin liburu bikaina da aste honetan osorik eskainiko dizuguna: Atoiuntzia. Edorta Jimenezek 1990ean idazle mundakarrak murgil egin zuen narratibaren uretan, eta txukun asko egin gainera. Omar Nabarroren izenpean poema-liburuak ezagutzen genizkion ordura arte (Itxastxorien bindikapena, Egutegi esperimentala, Gaua zulatzen duten ahausietan...), eta bere poemetakoaz gain beste mundu batzuk ere nabiga zitzakeela erakutsi zigun. Atoiuntzia-ko narrazioetan bere inguruari, geografikoari eta historikoari, begira jarri zen Jimenez eta begiratu beharrekoa dela erakutsi. Gerora bere eleberri batzuetan jorratu dituen elementuak (Azken fusila, Kilkerren hotsak) antzeman daitezke ipuin eder hauetan.
Sanchez Irure eta Joxe Ayerbe euskaraz.net-en
Euskaraz.net-ek
beste bi liburu jarri ditu sarean. Lehenengoa, Loiolako Joxe Ayerbek, Bartolo
Ayerberen semeak, jarritako bertsoekin osatutako Alako
batean liburua, Antonio Zabalak Auspoa sailean argitaratua. Hirigintza
baldarraren salaketa egiten duen "Gure baserriak" bertso sorta irakur
daiteke bertso horien artean. Bigarrena, Kaietano
Sanchez Irure (1856 -1916) idazle donostiarraren Azken
beltza antzezlana. Lan honek Donostiako Udalaren saria jaso zuen 1915ean
eta Euskal Iztundeak 1917an antzeztu zuen lehen aldiz Antzoki Zaharrean.
Antso Azkarra pastorala Maulen
Uztailaren 25ean (nesken egüna) lehen aldiz eta agorrilaren 1ean gero (igandea), aurten ere bitan jokatu dute pastorala Maulen. Jean Louis Davantek Antso Azkarraren milurtekoa hartu du gaitzat idatzi pastoralean. Berria egunkariak gune berezia atondu du pastoralaren karietarat, eta bertan afitxa ikusi, pastoralaren inguruan idatzi albisteak irakurri, edota pastoralaren testu osoa ere irakur daiteke. Lehen peredikütik, 12garren kantara, guztira 23 jelkaldik osatzen du Antso Azkarra pastorala.
Efemerideak
1864ko abuztuak 5: Resurrecion
Maria Azkue jaio zen Lekeition.
1900 abuztuak 5: Justo Garate jaio
zen Bergaran.
1592 abuztuak 7: Arnaud Oihenart
jaio zen Maulen.
1971 abuztuak 7: Bingen Aizkibel
hil zen Buenos Airesen.
1882 abuztuak 7: Emiliano Mujika
jaio zen Albizturren.
1961 abuztuak 9: Nikolas
Ormaetxea Orixe hil
zen Añorgan.
1897 abuztuak 10: Dominique
Soubelet jaio zen Hazparnen.
1901 abuztuak 10: Charles Bernadou hil
zen Baionan. .
1961 abuztuak 10: Jean Etxepare
Landerretxe hil zen Hazparnen.
1999 abuztuak 10: Bernardo
Estornes Lasa hil zen Donostian.
1899 abuztuak 11: Alejandro Tapia
Perurena jaio zen Iruñean.
1919 abuztuak 11: Alfonso Maria
Zabala hil zen Hernanin.
1924 abuztuak 12: Xabier
Gereño jaio zen Bilbon.
1939 abuztuak 12: Juan Bautista
Eguzkitza hil zen Lemoan.
Agenda
Bernardo Atxagak hitzaldia eskainiko du abuztuaren 19an (osteguna) 20:00etan Irungo Ficoba erakustazokako Auditorioan.
Nahi izanez gero, orain arteko Literatur Emailuak irakurgai dituzu Susa literatura argitaletxeko webgunean.