Emeterio Arreseren eskuizkribuak
Aurten 50 urte dira Emeterio Arrese hil zela. Poetaren eskuizkribu batzuk aurkitu dituzte berriki Javier Bello Portu musikari zenaren paperen artean, haren zaintzapean utzi baitzituen Arresek. Koaderno batean eskuz idatzirik datoz 31 poema, horietatik hamar Olerki berrizte bilduman (Kuliska Sorta 1952) argitaratuak, beste zenbait aldizkarietan plazaratuak, baina baita ere guretzat ezezagunak diren batzuk. David Azurza eta Joxemari Iturraldek utzi digute koadernoa, eta faksimilea egin dugu, berorren transkripzioaz.
Euskarazko etsaminak
EUTGko Letras-eko fakultatean azterketak euskaraz egin eta horren ondorioz sortutako zalaparta hartu zuten aintzat Saizarbitoriak eta Izagirrek orain 25 urteko Zeruko Argiako Oh! Euzkadi saileko komentarioan. Katedradunen batek azterketak euskaraz egin zituztenen aurka esandakoekin, atzekoz aurrera, osatu zuten artikulu nagusia. Idazle gonbidatua Pello Lizarralde izan zuten, eta tarterik ere bai orain 25 urte Madrilen hil zen Blas de Otero gogoratzeko.
Xabier Azurmendiren Jesus
Izatearen malura (1971) eta Maiteño(1973) poemarioen ostean, 1978an beste poema liburu bat kaleratu zuen Xabier Azurmendik: Jesus. Poetaz gain historialari eta ikertzailea ere bazenak Nazaret-eko Jesus gai zuen poema liburua idatzi zuen, ikuspuntu erlijioso bai baina berezi batetik. Irrisko Sortako bosgarrena egin zuen hauxe izan zuen poesian azkena, eta gerora Patri Urkizurekin batera kaleratu zuen Santa Kruz apaizari buruzko ikerketa lan bat. 1996an hil zen. Jesus bere liburua osorik eskaintzen dizugu.
Neruda eta Otero Egan-en
1904ko uztailaren
12an jaioa, mendeurrena da Pablo
Neruda poeta txiletarrarena. 2003ko iraileko 89. Literatur Emailuan, bere
heriotzaren 30. urteurrena zela-eta, eskaini genituen euskarara ekarritako
Nerudaren bost
poema. Bada besterik: Egan aldizkarian, 1973ko zenbakian, Ibon
Sarasolak Pablo Nerudaren poema baten itzulpen
"polemikoa" kaleratu zuen. Eta bestalde, mendeurrena dela eta, Jose Luis Padronek
oraintsu kaleratu du Amodiozko hogei poema eta kanta bat bakar-mindua
poemarioa Gara egunkariarekin. Liburu honetako poemak Nerudaren beraren
ahotsean entzun daitezke.
Maskarada taldeak, bestalde, Antonio Skarmetak idatzitako Nerudaren
postaria taularatu zuen 1997an, Patxo Telleriak euskaratua.
Egan
aldizkarian bertan,
bestalde, aurki daitezke orain 25 urte zendutako Blas de Oteroren hainbat
poema, gaztelaniaz lehenak, eta euskaraz, Gabriel Arestik itzuliak, beste
dozena bat. Olerti
eta Korrok
aldizkarietan ere euskaratu zuten Oteroren poemarik: Literatur Aldizkarien
Gordailuan irakur daitezke denak.
Efemerideak
1837 uztailak 9: Luis Zirilo Iza jaio zen Bilbon.
1875 uztailak 9: Jean Barbier jaio zen Donibane Garazin.
1877 uztailak 9: Pierre Lhande jaio zen Baionan.
1999 uztailak 9: Jose Antonio Loidi Bizkarrondo hil zen Irunen.
1969 uztailak 10: Rikardo Arregi hil zen Mendaron.
1782 uztailak 14: Sebastian Mendiburu hil zen Bolonian, Italian.
1915 uztailak 14: Mariano Izeta jaio zen Elizondon.
Agenda
Jon Iñaki Lasa ipuinak kontatzen arituko da uztailaren 9an (ostirala) 11:00etan Mutrikuko Zabier kultur etxean.
Jon Benitok Orbel zaku bat irakurriko du uztailaren 9an (ostirala) 22:00etan Azkoitiko Etxe-Haitz tabernan. Aurkezlea: Xabi Borda.
Nahi izanez gero, orain arteko Literatur Emailuak irakurgai dituzu Susa literatura argitaletxeko webgunean.