—1883 Markina—

Goazen Markinara

Bonifazio Etxegarai

Martxa honen musika

Felix Ortiz y San Pelayok sortu zuen Markinan

kantatu zuen Orfeón Eibarrés-entzat.

                1

Goazen anaiak Markina aldera,

Goazen guztiyok kantatzen,

Begira nola Euskal-Erriyan

Danak diraden poztutzen,

Nola diraden alaitasunez

Eta otsarez betetzen,

Ikusirikan zer fest'ederrak

Markinan diran ospatzen.

                2

Goazen guztiok Euskal soinuak

Kantaturikan gogotik,

Euskaldun gauzak gure kantuaz

Odoietara jasorik,

Bizkaiko zelai, aitz ta mendiak

Arkitzen dira mugirik,

Beren aurrean ikusten diran

Fest ederrakin suturik.

                3

Goazen agudo Markina aldera

Entzun dezagun sansoa

Ikus dezagun Lekobideren

Semeen izantz osoa,

Goazen guztiyok aditutzera

Bertsolariyen jokoa,

Gure lurrean miragarriro

Gorde dan jolas gozoa.

                4

An ikusitzen diran gauz danak

Dirade gure gureak,

Ospatzen diran festa guztiyak

Euskaltasunez beteak,

Lekobideren erri gozoan

Gizaldiyetan gordeak,

Lur onetako seme danentzat

Egiyaz guziz maiteak.

                5

An entzuten da danbolina ta

Jotzen dituzte txistuak,

An edurturik ile bizarrak,

Dauzkaten gizon prestuak,

Dabiltza dantzan aditurikan

Euskaldun zarren soinuak,

Ikusirikan Euskal oiturak

Feniz antzera piztuak.

                6

Ala mendiyan dirurik gabe

Bizi diraden gizonak

Nola jauregi galant batean

Dirudun bizi diranak,

Txit atseginik kantatzen eta

Dantzan dabiltza dan danak

Fest oriyekin azturik beren

Naigabe, pena ta lanak.