—1868 Sara—

Enperatrizari

Joanes Oxalde

Airea: Gernikako arbola...

                        1

Sortzez Eskualdun, soldado xorthetik,

Gerletara joan nintzen ait'amen aldetik,

Nigarrez maiteño bat herrian utzirik,

Etzuten uste berriz ikus ni bizirik...

Soldado on izan naiz, ez dut urrikirik. (berriz)

                        2

Lehenbiziko sua, hantxet Italian,

Frogatu izan nuen Magenta-zubian,

Lerro osoak zoazen lurrerat aldian,

Enperadorea zen han gure erdian,

Harentzat hilen ginen guziak lorian. (berriz)

                        3

Magentaren ondotik, gero Solferino,

Hain su bizirik ez da izan egundaino.

Gur'Enperadorea, biba zu oraino!

Han ere suharrago baitzuen gu baino

Etsaiak arras amor eman arteraino. (berriz)

                        4

Bolboraren lanhoa altxatu zenean

Napoleon galopan, ezpata eskuan,

Begiak erabiliz bere inguruan,

— Non da etsaia, dio, joan deia airean?

— Horra non den ihaurri, etzana lurrean. (berriz)

                        5

Erromatik entzun da oihu bat Frantzian,

Mauduler batzu dira hasi errabian,

Gure Aita Saindua bortxatu nahian.

Bainan indarra urthu laster bihotzean,

Frantziako bandera agertu denean. (berriz)

                        6

Erromatik Frantzian berriz sarthurikan,

Amienxen nindagon izurrite hartan.

Herioaren eztaiak jastatu tut nik han,

Harekin hari ginen guziak borrokan,

Batzu hil zireneko, bertzeak khorrokan.(berriz)

                        7

Bere palaziotik entzunik berria,

Huna Enperatriza, zalhu ethorria,

Eriz eri dabila... zer ikusgarria!

Iduri aingeru bat Jaunak igorria,

Zure ganik zenbatek ez dugu bizia. (berriz)

                        8

Sei urtheren buruan, jin zautan orena,

Aspaldian Jaunari galdatzen nuena,

Ene herri maitera naiz alde-bat jina,

"Urtzo, begi urdina, hain fidel egona,

Orai aldean zaitut espos hein bat ona!" (berriz)

                        9

Haurretik maithaturik Jaunaren legea,

Bethi baliatu zait prestu izaitea;

Ongi zerbitzaturik Enperadorea,

Badut ohore frango, badu gurutzea.

"Bide beretik habil, hi ere, gaztea!" (berriz).