1864 Sara
Berritan ezkondu marinelaren adioak bere andreari
Migeltxo Ualde
Migeltxo Urruñako marinela zerbitzura gobernamenduaz
deithua ezkondu berrian bere bihotz mina
seinalatzen dio bere andreari segidako bertsuetan.
Airea: Xori bapho gorria... eta bertze asko.
1
Banoha, nere espos hanbat maithatua,
Bertze gazten artetik berritan hartua,
Itsasoz bertzaldera ni naiz manatua,
Oi! nola naite bizi, zutaz gabetua?
2
Ez dut uste badela lurrean lorerik,
Ez zeruan izarrik zure pare denik,
Nihon zutarik urrun, nik ez duket onik,
Eta nihon zurekin ez duket nik gaitzik.
3
Elizak juntatzean biak elkharrekin
Eman zautan bai gozo eta bai atsegin,
Bertzerik badut orai, bihotzean dut min,
Min hunen sendatzeko ez dakit zer egin.
4
Nere espos maitea, othoi, erradazu,
Ene sendagarririk ez othe dukezu?
Urrun hedatu gabe, badela jakizu,
Ene sendagarria bakharrik zare zu.
5
Bainan ez dut, ez zeren esperantza hartu;
Sobera zorrozki da legea mintzatu.
Eri edo ez eri, behar naiz partitu,
Barnea tristerikan zutarik urrundu.
6
Bela xuriak ditu haizeak hanpatzen,
Ja itsas-zabalera gaitu eramaten.
Oi! zugana banindu horrela ekhartzen!
Hori dut Birjinari bakharrik galdatzen.