—1859 Urruña—

 

Italiako gerla berriaren gainean

 

Joanes Oxalde

 

Airea: Atharratzeko, edo, Air national de la reine Hortensie

 

                  Bertso burua

Bi arrano bazauden hisia handian,

Begiak zorrozturik juan den aspaldian,

Elgar hatzeman dute ulhau ederrian,

Bat laster gelditu da hegalak lurrian.

 

                  1

Autrixiak azpian zaukan Italia

Salbu Piemontia, lekhu bat ttipia,

Osoki beretzeko zuen gutizia

Eta botatu harat harmada guzia.

      (berriz: Bi arrano)

 

                  2

Bainan, biba fransesak, biba bethi ere,

Juan dira denborarik nehon galdu gabe

Ehun mila soldado gizon baten pare,

Segur zirelarikan aurkitzia lore.

      (berriz: Bi arrano)

 

                  3

Jeneralak gidari juan dira alegera,

Hekien buruzagi Napoleon bera,

Bakea egiterat ekharria zena,

Gudukan egiterat bortxatu dutena.

      (Berriz: Bi arrano)

 

                  4

Frantzian gerlari gazte aiphatuak

Beren buiaz dira ezaxolatuak,

Iduri lehenko soldado zaharrak,

Beldurrik gabekorik, bihotzez azkarrak.

      (Berriz: Bi arrano)

 

                  5

Montébellon agertu lehenik bandera,

Forey jenerala da orduan athera

Etsaia hersatu du lekhuen hustera,

Uraz bertze alderat ihes egitera.

      (Berriz: Bi arrano)

 

                  6

Palestroko guduan bigarrena baitzen

Manuel Erregea Zuabekilan zen,

Haukien baionetak ederki jokatzen,

Errakarat etsaia metaka botatzen.

      (Berriz...)

 

                  7

Nola erran, nork aipha heien balentria

Magestan egin dute kolpe bat handia,

Solferinokoa, oi! zoin izigarria!

Ez daite zuzen khonda hango sarraskia.

      (Berriz...)

 

                  8

Laur ehun mila gizon ziren elgarrekin

Frantses eta Piemont Autrixianekin,

Egun guzia joka haritzearekin,

Frantsesa gelditu da Bitoriarekin.

      (Berriz...)

 

                  9

Lehertua etsaiak, lehenik ephea,

Eta gero laster du onhetsi bakea,

Dezagun bethi lauda Enperadorea,

Arras altxatu dauku berriz ohorea.

      (Berriz...)

 

                  10

Bi hilabethe oso gudukan egonik

Frantsesek izan dute laudorio onik,

Heien sartzeko bestek ez dute parerik,

Nihoiz ez da ikusi holako bertzerik.

      (Berriz...)

 

                  Bertsu buztana

Oi! Arrano supherra, hintuen bi buru,

Oraiko aldi huntan, diat nik bat kendu,

Bizirikan hukeien bildotsa larrutu,

Frantziatik ez banintz laster hegaldatu.

 

 

 

 


Anton Abbadiaren Koplarien Guduak

 


www.susa-literatura.eus