—1859 Urruña—

Etxeko xokhoa

Jean G(orostarso) Harozteguy

Orhiko xoria Orhin lakhet.

                          1

Orhiko xoria Orhin lakhetik da bizitzen,

Bere larre sasietan ez da hura unhatzen,

Han zen sorthu, han handitu, han hasi zen maithatzen

Han bere umen artean gozoki du kantatzen.

                          2

Dohatsu harek bezala egiten dakiena!

Orhin sorthu eta Orhin gazte-zahartzen dena!

Ez du jakin nahirik zer den kanpoko ona,

Bainan aldiz gozatzen du etxeko ziona.

                          3

Bego etxeko xokhoa oraino nor-berari!

Bego ait'amen etxola haur zuhur denari!

Etxea bethi etxe da, zenbat den itsusgarri,

Kanpoa bethi kanpo da zenbat den edergarri.

                          4

Etxean pena guziak dirade kontsolatzen,

Etxean zauri minenak noratbait ere hartzen,

Irriak, solas guziak non dirade han baizen,

Gaualdera familia denean bateratzen?

                          5

Familiako bizia, zein zaren plazertsua!

Zutaz gabetua dena, zertaz den gabetua!

Ume zurtza baten pare dabila herratua,

Ezin bere bihotzaren aurkhituz sosegua.

                          6

Zenbat urrikari dudan bizi dena kanpoan!

Bera da beretzateko mundu huntan ostean,

Jendez da sethiatua eta da desertuan!...

Laguntza onik ez duke bere behar-orduan.

                          7

Ahaide txarra hobe da ezenez atze ona,

Atzeak ez du balio etxekorik txarrena,

Hori da alde orotan kurri dohan errana,

Baina ongi aditzeko frogatu behar dena.