—1856 Urruña—

Kantu berriak herriko bestaren gainean

Arnaud Haramboure, Urruñako xantrea

Aire ezagutua

                      1

Huna non tugun noizbeit bestako egunak,

Urrundikan nahiaz deitzen gintubenak,

Guretzat urthean den egun ederrenak,

Iraungi beitez, beraz, bozkarioz denak.

                      2

Egun hauk direnean gu ganat hurbiltzen,

Hausarki gonbiduak ditugu egiten,

Hauzo herritarrekin atseinak zatitzen,

Hospeka hartako da jendea ethortzen.

                      3

Bezperatik ezkilak hasirik oihuka,

Gure bihotz samurrak atseinez punpaka,

Elizarat goizetik goazi murruka,

Hango edertasunak ez dite esplika.

                      4

Guziak Jainkoari gomendaturikan,

Hasten gare orduan hausarki jostetan,

Bathasun ertsiena delarik gu baithan,

Nork ez du laketuko eskal herrietan.

                      5

Hemen aditzen dire batzuek kantatzen,

Hortxet bixtatzen tugu bertzeak dantzatzen,

Xirola, tanbulina, gatanbore jotzen,

Bazter guziek dute gaur errepikatzen.

                      6

Plazaren erdiari badugu beiratzen,

Pilota jokoa hantxet da haurkitzen,

Gizonak artexenak ditugu ikusten,

Zalutasunakin ungi gudukatzen.

                      7

Gutartean pilota airos butatua,

Harat hunat airean da pasaiatua,

Egon gintazke huni beira landatua,

Iretsi ere gabe dugun pokadua.

                      8

Gudu hauxet denean gutartean hasten,

Trebesak egiterat gare lehiatzen,

Pilotak solas bide daukularik uzten,

Horrelaxet egun hauk dire iraungitzen.

                      9

Azkeneko atseina huna non dugula,

Bortzekuak elkarri ematen direla,

Jainko onak grazia erranez digula,

Hanitz urthez guziak gerta gaiten hola.

                      10

Egun hemen badugu dohain berezi bat,

Printze bat ethorria hunat gutarterat,

Atsein gozo hautarik zatien hartzerat,

Lehia gaiten denak hunen jostatzerat.

                      11

Mur d'Abbady hor da guzien bozteko,

Zahar eta gaztien alegeratzeko,

Moltsa ondo gabe bat badu banatzeko,

Kanteri, pilotari prima emateko.

                      12

Dugun eman eskerrak orai patroinari,

Laudorioak bezten egile oneri,

Ezagutza oso bat aita izanari,

Orhoitzapen hauk utziz ondorioeri.