Arrakala hau
pasabide jaioberria da,
haserretu diren belaunak,
mutuaren ezpainak,
erreka mapan behera.
Arrakala hau
kartzelen hormetakoa da,
36koak orbandu ez didana,
erdibatu ezinezkoa,
hankabakarraren lasterketa.
Arrakala hau
amaitu bako aitorpena da,
txaloka bizi den igogailua,
barreka dabizen betileak,
suak hartutako itxarongela.
Arrakala hau
zure bihotzeko postontzia da.
© Gotzon Barandiaran